نساء الملح

img

هذه القصيدة كتبت في 18 5 2011 عندما شاهد الشاعر المبدع عارف مامون تحقيق اسمه نساء الملح على احدى القنوات التلفزيونية ويلتقي فيه نساء من محافظة الناصرية مدينة الشاعر…اجبرتهن الظروف على جمع الملح وبيعه من اجل شراء غذاء لاطفالهن…الشاعر خاطب احدى النساء ظهرت في البرنامج تدعى ام حسين ..اجابت على سؤال لمقدم البرنامج ..عندما سالها عن سبب العمل في هذه المهنة الشاقة والغير صحية …اجابته …يمه خبزة اطفالي جبرتني على الملح…
نعيد نشر القصيدة اليوم…. وما اشبه اليوم بالبارحة

للشاعر عارف مامون

شتلمين؟
ملح ويا الجروح
اشلون يم احسين؟
يا بت النفط..يم رافدين الخير
معقوله العراق يعوفج تجوعين؟؟
شتلمين؟
خاف الكاع تزعل من تشوفج هيج
لان خيرات بيها تكفي مليارين
شتلمين؟
خاف الملح باجر يزعل ويلزاد
احتجاجا على اوضاعج
واهلج مغلسين
اسالج فد سؤال بقصد مو تحريض
ولكن هذا حالج فزز الميتين
الاخذو صوتج امس
من رحتي للصندوك
ما مروا عليج وشافوا شتردين؟
معقوله اعله بابج باجر يردون
ومن حلهه وجديد النوب تنتخبين
ماكلج اكعدي وسدي باب البيت
تلحك على بيتج كون ماتطلعين
انعم الله على الربع فادوج بس بهاي
شح ملح البطاقه وصار سوكج زين
بس سعر الملح بيه ثمن خبزات
لو يطلع ثمن من مصرف الزنكين
بميزان الملح وزني اليريدج صوت
واختاري الينقذج من دواهي البين
اليجي بطرك الدعايه ويحجي نفس العام
كوليله بصراحه وبالج تخافين
اخذ كل الصور والملصقات وياك
دكهن على القصور
ترفضك اهل الطين
بيت الفقره حايط ..لافتات الموت
مايصلح دعايه ..يفيد للتابين
صوتج مثل شيلة وجهج المتعوب
يستر باختيارج كل جرح بعدين
يم بيت الحواسم..هسه بيدج صوت
بس بلايه عين يصير ضدج عين
الماياخذ درس من مدرسة الايام
وحك عينج ياخاله يروح بالرجلين

1444total visits,2visits today

الكاتب shababek

shababek

مواضيع متعلقة

3 تعليق على “نساء الملح”

  1. غير معروف

    تحيه للشاعر عارف والى ام حسين واقول ان مشروع المؤامره والتي حيكت ضد شيعة ال البيت ومنذ قرون ,منذ اندس عملاء الوهابيه والبعثيه والاخوان المسلمين في صفوف الانصار والمهاجرين وجلسوا تحت سقيفة بني ساعده لا لغرض انساني ولكن لغرض ان يكون مستقبل العراق وشيعة ال البيت انكس من حالة ام حسين ,ولكن نوجه الكلام المن شو عملية سياسيه وكلها مجرمين والهم سوابق والله ذب عليهم صفة مايشبعون يسرق وينهب ويكود وبعده جوعان , من نعله على ابو الجابكم باسم الاحزاب الدينيه والغرض ان تتسلطون على عرب العراق شيعة ال البيت , ولكن الدهر يومان يوم لك ويوم عليك والمشتكى الى صاحب العصر قائم ال محمد بان يقطف رؤوس هؤلاء السفله .

  2. عارف مأمون

    شكرا لشبابيك الرائع…
    شكرا للرائع والعراقي الغيور صديقي المهندس كريم البيضاني
    دائما اشعر بمذاق خاص وانا اقرأ واشاهد قصائدي تنشر على صفحات هذا الموقع العراقي الجميل
    واعرف ان من ينشر ويقرأ ويتابع هذا الموقع يحمل روح عراقية اصيلة وحريصة وتحمل هم الشعب العراقي
    تحياتي وامتناني

اترك رداً